القادر ٹرسٹ کیس کا فیصلہ موخر ہونا کسی ڈیل کا حصہ نہیں ، بیرسٹر گوہر

القادر ٹرسٹ کیس کا فیصلہ ملتوی ہونے پر چیئرمین پی ٹی آئی بیرسٹر گوہر کا ردعمل آ گیا۔

میڈیا سے گفتگو کرتے ہوئے بیرسٹر گوہر نے کہا کہ عدالتی عملے نے آگاہ کیا تھا کہ فیصلہ آج سنایا جائے گا، ہمارے ساتھ ناانصافی ہو رہی ہے، ہم فیصلے کےلیے تیار ہو کر آئے تھے ، جج نے اپنی مرضی سے تاریخ دے کر فیصلہ مؤخر کیا۔

انہوں نے مزید کہا کہ 190 ملین پاؤنڈ کیس بے بنیاد ہے، اس کیس کا مقصد بانی پی ٹی آئی کو زیر کرنا تھا، بانی پی ٹی آئی نے کوئی مالی فائدہ نہیں لیا۔

ان کا کہنا تھا کہ بشریٰ بی بی پہنچ گئی تھیں ، فیصلہ ہماری طرف سے مؤخرنہیں کیا گیا ۔ ملزمان کو عدالت حاضر کرنا جیل انتظامیہ کی ذمہ داری ہے ، فیصلہ موخر ہونا کسی ڈیل کا حصہ نہیں ، کیس کا فیصلہ ہونا چاہئے۔

اس موقع پر سلمان اکرم راجہ نے کہا کہ تاثر دیا جا رہا ہے کہ کوئی ڈیل ہو رہی ہے ، کوئی ڈیل نہیں ہو رہی ، مذاکرات جمہوریت کے لیے کر رہے ہیں۔