مردان میں تخت بھائی جلالہ پل کے قریب ریموٹ کنٹرول بم دھماکے میں 3افراد جاں بحق جبکہ پولیس اہلکار سمیت 8افراد زخمی ہو گئے ۔
ابتدائی معلومات کے مطابق دھماکہ تخت بھائی جلالہ پل کے قریب ہوا ،اطلاع ملنے پر ریسکیو ٹیمیں اور پولیس نفری فوری طورپر موقع پر پہنچ گئی۔
ریسکیو کی میڈیکل ٹیموں نے نعشوں او ر زخمیوں کو فوری طورپر ہسپتال منتقل کردیا ۔
پولیس نے جائے وقوع سے شواہد اکٹھے کرتے ہوئے واقعے کی تحقیقات شروع کردی ہے۔
اس حوالے سے ڈی پی او مردان ظہور آفریدی نے میڈیا سے گفتگو میں بتایا ہے کہ مردان میں پولیس موبائل کے قریب آئی ای ڈی دھماکا ہوا۔ دھماکے سے رکشہ میں سوار 3 افراد جاں بحق ہوئے۔
ڈی پی او مردان کا کہنا ہے کہ پولیس موبائل میں سوار 2 اہلکار اور رکشہ میں سوار 3 افراد دھماکے کے نتیجے میں زخمی ہوئے ہیں۔ بارودی مواد روڈ کنارے پہلے سے نصب تھا، پولیس گاڑی گزرتے ہی دھماکا ہوا۔