خیبر پختونخوا میں اہم شخصیات کی سیکورٹی کے لیے الگ ونگ کے قیام کا فیصلہ کیا گیا ہے۔ سیکیورٹی ونگ کے لیے 11 ہزار 483 اسامیاں پیدا کی جائیں گی۔ محکمہ داخلہ نے سمری تیار کرلی۔
آج نیوز کو حاصل ہونے والی محکمہ داخلہ کی دستاویز کے مطابق خیبر پختونخوا میں 10 ہزار 483 سیکورٹی اہلکار اہم شخصیات کی سیکیورٹی پر مامور ہیں جس کے باعث شہریوں کی سیکورٹی کے لیے پولیس اہلکاروں کی کمی کا سامنا ہے۔
اب طے کیا گیا ہے کہ وی آئی پیز کی سیکیورٹی کے لیے الگ ونگ قائم کیا جائے جس کا نام سیکورٹی ڈویژن رکھا جائے گا اور اس کے لیے 11 ہزار 483 بھرتیاں کی جائیں گی۔
سیکیورٹی ڈویژن میں 8 ایس پی، 105 سب انسپکٹر، 210 اسسٹنٹ سب انسپکٹر، ایک ہزار 48 کانسٹیبل اور 10 ہزار 483 کانسٹیبل ہوں گے۔
بھرتیاں تین مراحل میں ہوں گی۔ اس کے لیے سالانہ 6 ارب روپے سے زیادہ کا بجٹ مختص کیا جائے گا۔ محکمہ داخلہ کی سمری کی منظوری کابینہ سے لی جائے گی جس کے بعد منصوبے کو 2026 تک مکمل کیا جائے گا۔