پاکستان تحریک انصاف (پی ٹی آئی )نے 5 اگست کو ملک بھر میں بھرپور احتجاج کی کال دیدی۔
اسلام آباد: پی ٹی آئی رہنماؤں عمرایوب، اسد قیصر اور شیخ وقاص اکرم نے اسلام آباد میں میڈیا سے گفتگو کی، اپوزیشن لیڈر قومی اسمبلی عمر ایوب نے گفتگو کرتے ہوئے کہا کہ کل کے اجلاس میں پارلیمنٹرینز کی جانب سے آئندہ لائحہ عمل کے بارے میں فیصلے کا اعلان کیا ہے۔
عمر ایوب نے حکومت کو انتباہ کیا ہے کہ ہوش کے ناخن لیں ورنہ ملک تباہی کی طرف جائے گا۔ انہوں نے رؤف حسن اور دیگر کے جسمانی ریمانڈ کی شدید مذمت کرتے ہوئے سوال اٹھایا کہ ایف آئی اے کو جسمانی ریمانڈ کی کیا ضرورت ہے۔
عمر ایوب نے کہا کہ پی ٹی آئی کے دور میں آئی پی پیز کے ساتھ کیے گئے معاہدے سستے تھے اور ہمارا مقصد ملک میں سستی توانائی فراہم کرنا تھا۔ انہوں نے ساہیوال پلانٹ کے لیے درآمدی کوئلے کی کیا ضرورت تھی۔
اپوزیشن لیڈر قومی اسمبلی عمر ایوب نے تحریک تحفظ آئین پاکستان میں پانچ جماعتوں کی شمولیت کا اعلان کیا۔
رہنما پی ٹی آئی اسد قیصر نے الزام لگایا ہے کہ ان کے ایم این ایز کو وفاداری تبدیل کرنے کی پیشکشیں کی جا رہی ہیں اور یہ کارروائیاں سپریم کورٹ کے فیصلے کے بعد کی جا رہی ہیں۔
انہوں نے کہا کہ سپریم کورٹ کو اپنے فیصلے کی توہین میں سوموٹو کارروائی کرنی چاہیے۔ اسد قیصر نے کہا کہ موجودہ حکومت کی کارکردگی ملک کو اس نہج پر لے آئی ہے کہ وہ اس طرح نہیں چل سکتی۔ انہوں نے کہا کہ ہم جماعت اسلامی کے احتجاج کو سپورٹ کرتے ہیں ، ہمارا مطالبہ ہے کہ آئی پی پیز کے معاہدوں کو دوبارہ دیکھا جائے۔
انہوں نے کہا کہ دو ایشوز پرپورے ملک میں 5اگست کو جلسے اور مظاہرے کریں گے، بانی پی ٹی آئی کو پانچ اگست کو غیرقانونی طریقے سے گرفتار کیا گیا، بانی پی ٹی آئی کی رہائی اور مہنگائی کیخلاف بھرپور مظاہرے کریں گے۔
دسمبر میں حکومت ہماری ہوگی بانی پی ٹی آئی وزیراعظم ہوں گے، اسد قیصر
اسد قیصر نے کہا کہ ٹیکسز کی وجہ سے انڈسٹری ختم ہو رہی ہے اور غریب آدمی اتنے مہنگے بل کیسے ادا کرے گا۔ انہوں نے یہ بھی کہا کہ ہم کوشش کر رہے ہیں کہ ملک میں عدم استحکام نہ آئے اور سب سیاسی جماعتوں کو ایک میز پر بیٹھ کر حکومت کو رخصت کرنے کے لیے بات چیت کرنی چاہیے۔
شیخ وقاص نے کہا کہ سپریم کورٹ کے فیصلے کے بعد اینٹی کرپشن ادارہ بھی فعال ہو گیا ہے اور انہوں نے حکومت سے درخواست کی ہے کہ ملک کو مزید تباہی کی طرف نہ دھکیلا جائے۔