خیبر پختونخوا کے دوسرے بڑے شہر مردان میں پولیس چوکی پر دہشتگردوں کی فائرنگ سے ایک پولیس اہلکار شہید ہوگیا۔
پولیس کے مطابق فائرنگ کا واقعہ مردان کی تحصیل تخت بھائی آثار قدیمہ میں واقع پولیس چوکی پر پیش آیا۔ صبح سویرے شرپسندوں نے چوکی پر فائرنگ کردی جس کے نتیجے میں عمر نبی نامی پولیس اہلکار شہید ہوگیا۔
فارئرنگ کے نتیجے میں 2 اہلکار کانسٹبل محمد فیاض اور کانسٹبل شبیر بھی شدید زخمی ہوئے۔ لاش اور زخمی اہلکاروں کو فوری طور پر مردان میڈیکل کمپلکیس (ایم ایم سی) منتقل کردیا گیا۔
پولیس نے بتایا ہے کہ واقعے کے فوری بعد بھاری نفری نے موقع پر پہنچ کر علاقے کو گھیرے میں لے لیا اور سرچ آپریشن شروع کردیا ہے۔
اس حوالے سے وفاقی وزیر داخلہ محسن نقوی نے اپنے ایک بیان میں مردان پولیس چوکی پر دہشتگردوں کے حملے کی مذمت کی ہے۔ انہوں نے حملے میں شہید ہونے والے پولیس کانسٹیبل کو خراج عقیدت پیش کیا ہے۔
محسن نقوی نے شہید کانسٹیبل کے اہلخانہ سے دلی ہمدردی و اظہار تعزیت کرتے ہوئے کہا ہے کہ شہید کانسٹیبل نے فرائض کی ادائیگی میں شہادت کا اعلی ٰمرتبہ پایا ہے۔خیبرپختونخوا پولیس کے بہادر سپوت عمر نبی کو سلام پیش کرتے ہیں۔