پاکستان نے فرینکفرٹ میں پاکستانی قونصل خانے پر حملے پر جرمنی کی حکومت سے شدید احتجاج کیا ہے۔
ترجمان دفتر خارجہ نے کہا ہے کہ پاکستان قونصل مشن کے تحفظ میں ناکامی کی مذمت کرتا ہے، قونصل خانے کی حفاظت اورسفارتکاروں کی سلامتی میزبان حکومت کی ذمہ داری ہے۔
ترجمان نے مزید کہا کہ کل پاکستان کے قونصل خانے کی سلامتی کو خطرے میں ڈالا گیا ، جرمن حکومت ویانا کنونشنز کے تحت اپنی ذمہ داریوں کو پورا کرکے پاکستانی سفارتی مشنز اور عملے کی سلامتی یقینی بنانے کیلئے اقدام کرے۔
ترجمان کا کہنا تھا کہ جرمن حکام سکیورٹی کی خامیوں کے ذمہ دار افراد کو جوابدہ ٹھہرائیں اور ملوث افراد کو گرفتار کرکے ان کیخلاف کارروائی کریں۔