پارلیمنٹ کی خصوصی کمیٹی نے آئینی ترمیم کے مسودہ کی منظوری دے دی ہے۔
خورشید شاہ کی زیرصدارت پارلیمان کی خصوصی کمیٹی کا اجلاس ہوا جس میں مسودے پر غور کیا گیا۔
بعدازاں میڈیا سے گفتگو کرتے ہوئے خورشید شاہ کا کہنا تھا کمیٹی نے متفقہ طور پر ترمیم کا مسودہ منظور کیا ،اوورسیزپاکستانیوں کو الیکشن لڑنے کی اجازت دینے کی تجویز پر اتفاق کیا گیا ہے۔
کامیابی کے بعد 3ماہ میں اوورسیز پاکستانیوں کو دوسرے ملک کی شہریت چھوڑنا ہو گی ،مسودہ وفاقی کابینہ کی منظوری کے بعد ایوان میں پیش کیا جائےگا۔
ایم کیو ایم کے رہنما فاروق ستار نے خصوصی کمیٹی اجلاس کے بعد گفتگو کرتے ہوئے کہا آج تمام جماعتوں نے مسودے پر اتفاق کیا،آج جو ڈرافٹ فائنل ہوا یہی حتمی ہے۔
سمندر پار پاکستانیوں کو الیکشن لڑنے کا حق دینے کی تجویز ہماری ہے،ہماری تجویز پر بیشتر ارکان نے اتفاق کیا۔
مزید خصوصی کمیٹی کا کوئی اجلاس نہیں ہو گا،تقریباً مسودہ پر اتفاق رائے ہوگیا ہے۔
تحریک انصاف نکات پر مخالفت نہیں کررہی ہے،پی ٹی آئی سیاسی بنیادوں پر اپنی پالیسی کے مطابق مخالفت کررہی ہے، جب تک قومی اسمبلی و سینیٹ میں مسودہ پیش نہیں ہوتا کوئی مسودہ حتمی نہیں ہوگا۔
ن لیگ کے رہنما عرفان صدیقی نے کہا خصوصی کمیٹی کے اجلاس میں بہت اہم پیشرفت ہوئی ،خصوصی کمیٹی نے آئینی ترمیم کا مسودہ منظور کر لیا ہے،خصوصی کمیٹی کے اجلاس میں حتمی مسودے کی منظوری دی گئی۔
پی ٹی آئی کے عامر ڈوگر نے بھی مسودے پر مجموعی طور پر اطمینان کااظہار کیا،کمیٹی میں مسودے پر اتفاق رائے اہم سنگ میل ہے،کسی جماعت کی طرف سے کوئی اختلافی نوٹ نہیں آیا۔