وزیرِ اعلیٰ خیبر پختونخوا نے ضلع کرم میں قیام امن کی راہ میں رکاوٹ بننے والوں کے خلاف سخت اقدامات کرنے کا اعلان کیا ہے۔ علی امین گنڈا پور کا کہنا ہے کہ چند شرپسند عناصر کی سروں کی قیمت مقرر کی گئی ہے تاکہ مسئلے کو جڑ سے ختم کیا جا سکے۔
وزیر اعلیٰ خیبر پختونخوا نے کہا کہ حکومت نے کرم میں قیام امن کے لیے سنجیدہ اقدامات کیے ہیں اور جو عناصر امن کی راہ میں روڑے اٹکائیں گے، ان سے آہنی ہاتھوں سے نمٹا جائے گا۔ انہوں نے مزید کہا کہ بنکرز جنہیں روزانہ گرایا جا رہا ہے، کرم میں امن کے قیام کے لیے ایک بڑی رکاوٹ تھے۔
علی امین گنڈا پور نے کہا کہ کرم کے مسائل کو جرگے کے ذریعے حل کرنے کی کوششیں کامیاب رہی ہیں، اور اس علاقے میں 100 سال سے زیادہ پرانا مسئلہ وقتاً فوقتاً اٹھتا رہا ہے۔
وزیر اعلیٰ نے یہ بھی کہا کہ کرم میں راشن کی 4 بڑی کھیپ پہنچا دی گئی ہے اور چیلنجز کا مقابلہ کرنے کے لیے حکومت تیار ہے۔