لاہور: سیشن عدالت نے وزیراعظم شہباز شریف کی جانب سے دائر 10 ارب روپے کے ہرجانے کے کیس میں چیئرمین تحریک انصاف عمران خان کے وکیل کی جانب سے جرح کے لیے مہلت دینے کی درخواست منظور کر لی ہے۔
عدالت کی جانب سے جاری تحریری حکم نامے کے مطابق جج یلماز غنی نے کیس کی سماعت کے دوران وزیراعظم شہباز شریف کے گواہ عطا اللہ تارڑ کا بیان ریکارڈ کیا۔
تحریری فیصلے میں کہا گیا ہے کہ عمران خان کے وکیل کی استدعا پر جرح کے لیے وقت دیا گیا ہے، اور اب عطا اللہ تارڑ 15 نومبر کو دوبارہ عدالت میں پیش ہو کر اپنے بیان پر جرح کے مراحل مکمل کریں گے۔
یاد رہے کہ وزیراعظم شہباز شریف نے عمران خان کے خلاف 10 ارب روپے ہرجانے کا دعویٰ دائر کر رکھا ہے، جو اس وقت لاہور کی سیشن عدالت میں زیرِ سماعت ہے۔